ABŞ və KXDR liderləri Donald Tramp və Kim Çen In arasındakı təmaslar Koreya yarımadasında sülhə töhfə verəcək, bu səbəbdən Koreya Respublikası hakimiyyəti onların görüşünün təşkilinə köməklik göstərməyə hazırdır.

“İki sahil” TASS-a istinadla xəbər verir ki, bu barədə Koreya Respublikasının Birləşmə Nazirliyindən bildirilib.

"KXDR və ABŞ arasında dialoq, əgər belə bir təşəbbüs reallaşarsa, hesab edirik ki, Koreya yarımadasında sülh və sabitliyə, habelə Cənubla Şimal arasında barışıq və əməkdaşlığa keçidə töhfə verəcək", — deyə "Yonhap" agentliyi qurum əməkdaşının bəyanatını sitat gətirir.

Nazirlikdən əlavə edilib ki, onlar ardıcıl olaraq KXDR və ABŞ arasında dialoqun bərpa olunmasının tərəfdarı kimi çıxış ediblər və bu təşəbbüsə dəstək verməyə hazırdırlar.

Koreya Respublikası Prezidentinin Administrasiyası da analoji mövqe ilə çıxış edib. Rəsmilərin sözlərinə görə, Seul ABŞ və KXDR liderləri arasındakı dostluq münasibətlərinin Koreya yarımadasında sülh və sabitliyə töhfə verəcək predmetli müzakirələrin başlamasına gətirib çıxaracağına ümid edir. Administrasiya həmçinin diplomatik dəstək göstərməyə hazır olduğunu vurğulayıb.