Cənub bölgəsinin mirvarisi sayılan Lənkəranda son vaxtlar yeniyetmələr arasında bədii gimnastikaya böyük maraq yaranıb. Onlara dəstək məqsədilə şəhər Gənclər və İdman İdarəsi, eləcə Azərbaycan gimnastika Federasiyasının birgə təşkilatçılığı ilə bu idman növü üzrə master-klas təşkil olunub. Onu da bildirək ki, ustad dərsi məşqçilər və yaşı səkkizdən yuxarı olan gimnastlar üçün nəzərdə tutulub. Master-klas isə bədii gimnastika üzrə yığma komandanın məşqçisi Səbinə Hacıyeva və yığma komandanın üzvü Nərmin Bayramova tərəfindən aparılıb.
Ruzanna Dünya çempionatında
Masallıdan olan güləşçi xanım Ruzanna Məmmədovanın sorağı dünyanın mötəbər yarışlardan gəlir. Sevindirici haldır ki, Rumıniyanın paytaxtı Buxarestdə Avropa çempionu adını qazanan bu güləşçi xanım İtaliyanın paytaxtı Romada 25-31 iyul tarixlərində keçiriləcək Dünya çempionatda Azərbaycanı güləş üzrə qadınlardan ibarət yığma komandada təmsil edir. Ruzannanın ilik yarış günü 27 iyulda nəzərdə tutulubdur. O, 49 kiloqram çəki dərəcəsində xalça üzərinə çıxar. Avropa çempionun rəqibi 26 iyulda keçirilən püşkatma mərasimində müəyyən olunar.
Sağlam gələcək naminə
Astara rayonunda hər həftəsonu təşkil olunan “İdman hamı üçün” layihəsinə dəstək, eləcə də rayonda yeniyetmə və gənclər arasında sağlam həyat tərzini kütləviləşdirmək məqsədilə “Street workout” (Açıq hava fitnesi) çoxnövçülük üzrə idman yarışları, karate və idman etüdləri keçirilib. Sağlam həyatı təmin edən bu idman tədbirlərin maraqlı, yadda qalan olmasından ötrü məşqçi-müəllimlərdən A. Ağazadənin, Ə. Ağayevin, “İntellektli və Sağlam Gənclər” İctimai Birliyinin sədri C. Cəfərlinin zəhməti daha çoxdur.
Sonda tədbirdə fərqlənən yeniyetmə və gənclərə Rayon Gənclər və İdman İdarəsinin sertifikatları təqdim olunub.
Lerikdə futbol sevinci
Dağlar diyarı Lerikdə futbol həvəskarlarını qarşıdan maraqlı yarışlar gözləyir. Yaxın günlərdə idmanın bu növü üzrə Vətən müharibəsi şəhidlərinin xatirəsinə həsr olunmuş rayon çempionatı başlayır. Çoxdan gözlənilən çempionatın təşkilatçısı Lerik Rayon Gənclər və İdman İdarəsi, tərəfdaşı isə Gənclərin İnkişaf və Karyera Mərkəzinin Lerik nümayəndəliyidir. Yarışlarda iki qrupda 11 komanda yaşıl meydançaya çıxar.
Artıq püşkatmanın nəticələri və oyunların tarixləri bəllidir. İlk oyun günü 28 iyul 15:00 başlanar. Rəqiblər “Şəhidlər”(Lerik) və “Pirasora” komandaları olacaq.
Zəfər Orucoğlu,
Azərbaycan Jurnalistlər Birliyinin üzvü
