44 günlük haqq savaşımızda Vətəninə bağlılığı, torpağına sədaqəti ömrünün iyirminci ilində Zaman Balakişiyevi müqəddəs şəhidlik zirvəsinə ucaldıb. Fəqət, Qarabağın müqəddəs torpaqlarının azadlığı uğrunda döyüşməsi Zamana ölüm yox, əbədiyyət qazandırıb. Nə qədər Azərbaycan var olacaqsa, tarixdə silinməz iz qoyan bu, qəhrəman Vətən sevdalısı ürəklərdə yaşamaqla, adı dillərdən düşməz, ona zaman-zaman əziz bir övlad kimi sonsuz ehtiram sevgi və məhəbbət olacaq. Çünki o, ömrünün ən gözəl çağlarını Vətənin yaşamasına sərf edib.
Sabirabad rayonunun Qaralar kəndində dünyaya göz açan Zaman Dadaş oğlu Balakişiyev uşaqlıqdan Vətənə sevgi, doğma yurduna təəssübkeşlik ruhunda boya-başa çatıb. Qeyrət, mərdlik onun qanına ana südü ilə birlikdə hopub. Ürəyindəki arzuları yalnız Vətənin azadlığı, xalqının gələcək xoş həyatından doğub. Yurduna dadanmış erməni dığalarına nifrəti sonsuz olub. Məsuliyyətli, xeyirxah, haqq tapınıb gələcəyə yön alan gənc yağıdan Vətənin qisasını almaq üçün orduda olmağı əsas şərt sayıb.
Məqsədinə çatan Zaman cəbhə bölgəsində canından artıq sevdiyi Vətənə sədaqətlə xidmətə başlayıb. Hər işdə fədakarlıq, mərdlik nümunəsini göstərib. Çox keçmir ki, bacarığı, iradəsi, dığalara yerini göstərməkdən ötrü hərbiyə sevgisi ona hörmət qazandırıb. Komandirləri Zamana inanıb, güvəniblər. Biliblər ki, son damla qanını Vətən yolunda verməyə qadir bir gəncdir. Zamanda əsgər yoldaşlarına deyib ki, erməni dığalarının Qarabağımızı əsarətdə saxlaması bizə heç cür yaraşmır. Onlara öz gücümüzü göstərməsək, gələn nəsillər bizi bağışlamaz. Bir də bu Azərbaycanın müqəddəsliyinə xələl gətirir . Əsir yurdumuzun azadlığa qovuşması yolu müharibədən keçir. Əgər belə bir gün gəlsə, mən birinci əlimə silah götürüb yağının üstünə gedərəm. Tam əminəm ki, qələbə bizim olacaq. Yaxşı deyiblər ki, torpaq igid, qeyrətli oğulların çiynində Vətən olur.
2020-ci il sentyabrın 27-də Azərbaycan xalqının illərlə həsrətlə gözlədiyi gün yetişib. Qarabağın azadlığı uğrunda xalqımızın qeyrətli, mərd oğulları döyüşə giriblər. Zaman ön sıralarda yer alıb. Ən qaynar nöqtələrdə düşmənə qarşı cəsarətlə vuruşub, onlara sarsıdıcı zərbələr vurub. Talış və Suqovuşan yaşayış məntəqələrində gedən ölüm-dirim savaşlarda misilsiz hünər göstərərək dığalara qan uydurub, onlarla canlı qüvvəsini, hərbi texnikasını məhv edib. Vətən torpaqlarını azad görmək istəyi igid əsgəri neçə-neçə döyüşdən zəfərlə çıxardıb. 8 oktyabra kimi odlardan, alovlardan keçməklə silahı əlindən yerə qoymayıb, ağır müharibə meydanında qəhrəmanlıqla vuruşub. Sonra ağır yaralanıb və tibb müəssisəsinə yerləşdirilib. Uzun müddət koma vəziyyətinə düşən əsgərin həyatını xilas etmək olmayıb. 7 mart 2021-ci ildə Zaman Balakişiyevin Vətən sevdalı ürəyi əbədi dayanıb. Doğma Qaralar kənd qəbiristanlığında torpağa tapşırılıb. Özü xalqın yaddaşına köçməklə, həm də “İgidliyə görə”, “Vətən uğrunda”, Laçının, Suqovuşanın azadlığına görə medalları dövlət tərəfindən onun göstərdiyi şücaətə verilən qiymət olub.
Ölümün gözünə dik baxıb Azərbaycanın ərazi bütövlüyü uğrunda döyüşərək canından keçən zəfər şəhidi Zaman bütün bir xalqın qürur yerinə dönməklə adı yaddaşlardan heç zaman silinməz.
Zəfər Orucoğlu,
Azərbaycan Jurnalistlər Birliyinin üzvü
