Lənkəran Şəhər İcra Hakimiyyətinin başçısı Taleh Qaraşov İstisu qəsəbəsində səyyar qəbul görüşü keçirdi. Açıq havada baş tutan tədbirdə  əvvəlcə Vətən yolunda şəhidlik zirvəsinə ucalan qəhrəmanların xatirəsi bir dəqiqəlik sükutla yad edildi. İcra başçısı  səyyar qəbulun keçirilmə məqsədi barədə deyib ki, yerlərdə  vətəndaşlarla  birbaşa dialoqun qurulması, qarşılıqlı etimadın güclənməsi və onları narahat edən məsələlərin həllinə köməklik göstərilməsi dövlətin qarşısında  duran əsas məsələdir.

İcra başçısı şəhid ailələri və Vətən müharibəsi iştirakçılarının qayğılarını, problemlərini diqqətlə dinlədi, qaldırılan məsələlərin həlli ilə bağlı tapşırıq və göstərişlərini verdi.

O, çıxışının davamında deyib: “Prezident cənab İlham Əliyevin siyasətinin mərkəzində insan amili dayanır. Vətəndaş-məmur münasibətlərində yeni düşüncə tərzinin  yaranması, dövlət qulluğunun xalqa xidmət mənasını ifadə etməsi və qarşılıqlı açıq dialoq mühitinin formalaşması zərurəti müasir dövrün tələbidir. 

Azərbaycan xalqı yumruq kimi dövlət başçısının ətrafında birləşməklə zəfərə imza atdı. Hazırda azad olunan torpaqlarımız yenidən qurulur. Artıq Ağalı kəndinə yerli sakinlərin Böyük Qayıdışı təmin edilib. Qarabağdakı quruculuq və bərpa işləri tamamilə Azərbaycan dövlətinin və xalqının maddi və mənəvi gücü ilə həyata keçirilir”.

İcra başçısının səmimi çıxışından sonra  istisulular öz təkliflərini söyləyib, problem və qayğılarının həllinə ən qısa zamanda nail olacaqlarına inamlarını ifadə etməklə  dövlət başçısı cənab İlham Əliyevə, Birinci vitse-prezident Mehriban xanım Əliyevaya sosial-iqtisadi vəziyyətlərinin günü-gündən yaxşılığa doğra dəyişdiyi, müraciətlərinə obyektiv və operativ baxıldığı, sosial infrastruktur layihələrinin uğurla həyata keçirildiyi üçün dərin minnətdarlığını bildirdilər.

 Zəfər Orucoğlu,

Azərbaycan Jurnalistlər Birliyinin  üzvü