Dövlət başçısının göstəriş və tələblərini gündəlik fəaliyyətində rəhbər tutan Lənkəran Şəhər İcra Hakimiyyətinin başçısı Taleh Qaraşov yerlərdə vətəndaşlarla açıq formatda dialoqun qurulması istiqamətində səyyar qəbul-görüşlərini davam edir. Aşağı Nüvədi qəsəbəsi və Güvənil kəndinin sakinləri ilə görüşü də səmimi alındı.
Vətən naminə canından keçən qəhrəman oğulların xatirəsinin bir dəqiqəlik sükutla anılmaqla başlanan görüşdə icra başçısı birinci həssas sosial təbəqələrin, şəhid ailələrin, qazilərin, Birinci və İkinci Qarabağ müharibələrinin veteranların, aztəminatlı və çoxuşaqlı ailələrin vəziyyətləri ilə maraqlandı. İcra hakimiyyətinin səlahiyyətlərinə aid bütün məsələlərin yerindəcə həll olunması üçün göstərişlərini verdi, vaxt tələb edən məsələlər barədə isə aidiyyəti qurumlara rəsmi müraciət olunması, eləcə nəticəsi barədə vətəndaşlara qanuna müvafiq formada cavablar veriləcəyini bildirdi.
Sonra vətəndaşlar qarşısında çıxış etdi:- Bütün şəhid ailələri, Vətən müharibəsi əlilləri birdəfəlik ödəmələrlə təmin olunublar. Baş nazirin müvafiq sərəncamı ilə artıq 4 avqustdan 11 min nəfərədək Birinci Qarabağ müharibəsi əlilinə birdəfəlik ödəmələr həyata keçirilib. Bu, dövlətin heç kimə qarşı ayrı-seçkilik etmədən ədalətli yanaşmasının təzahürüdür.
Aşağı Nüvədi qəsəbəsinin və Güvənil kəndinin sakinləri səmimi qəbul-görüşdən razı qaldılar, ölkədə hər bir vətəndaşa göstərilən diqqət və qayğının son dövrlər daha da artmasına, insan amilinin sosial dövlət quruculuğu prosesində orbitdə dayanmasına və sosial-iqtisadi layihələrin uğurlu tətbiqi nəticəsində gündəlik həyat səviyyələrinin hiss olunacaq şəkildə artmasına görə Prezident cənab İlham Əliyevə və Birinci vitse-prezident Mehriban xanım Əliyevaya minnətdarlıq etdilər.
Zəfər Orucoğlu,
Azərbaycan Jurnalistlər Birliyinin üzvü
