Xalq tətbiqi sənətin inkişafı və gənclərin asudə vaxtlarının səmərəli təşkili həmişə Masallıda  diqqət mərkəzində saxlanılır.  Rayonda bu istiqamətdə   tez-tez maraqlı tədbirlər təşkil edilir. Növbəti  səyyar tədbir isə   “Naxış - naxış gözəlliklər” başlığı altında təşkil olunmuşdu. Onun təşkilatçıları Masallı Tarix-Diyarşünaslıq Muzeyi, Gənclərin İnkişaf və Karyera Mərkəzinin Masallı nümayəndəliyi idi.  

Masallı Tarix-Diyarşünaslıq Muzeyinin direktoru, Əməkdar Mədəniyyət işçisi, Azərbaycan Jurnalistlər Birliyinin üzvü Əntiqə Tağıyeva tədbir iştirakçılarına misgərlik və xalçaçılıq sənətinin tarixindən danışdı. Sonra onlar Masallı şəhər sakini xalçaçı sənətkar Tünzalə Abuzərovanın ev emalatxanasında oldular. Sənətkar xalqımızın qədim sənət nümunələrdən  biri olan xalça sənətindən,  bu işin icra prosesinin maraqlı tərəflərdən  gənclərə əyani olaraq məlumat verdi. Gənclər xalça sənətinin valehedici iş prosesi ilə tanış olduqdan sonra dəzgah arxasında özlərini sınadılar.

Gənclər misgər Taleh Ağayevin emalatxanasına da  baş çəkdilər, burada  sənətkarın mis qabları necə qalay etdiyini,  eyni zamanda mis qab  üzərində döymə üsulu ilə vurduğu zərif naxışların işlənməsi prosesini canlı müşahidə etdilər.

Zəfər Orucoğlu,

Azərbaycan Jurnalistlər Birliyinin üzvü