Azərbaycanın Şərqi Zəngəzur iqtisadi rayonuna daxil olan Cəbrayıl rayonunda “Şəfəq” fotovoltaik (PV) günəş elektrik stansiyasının tikinti layihəsi tamamilə BP şirkəti tərəfindən maliyyələşdiriləcək.

“İki sahil” xəbər verir ki, bunu "BP-Azərbaycan" şirkətinin mətbuat xidmətinin rəhbəri Tamam Bayatlı jurnalistlərə açıqlamasında bildirib.

T. Bayatlı qeyd edib ki, bununla belə, digər maliyyə təşkilatlarının iştirakı məsələsi də istisna edilmir və "onlar tərəfindən belə bir niyyət olarsa, bu məsələyə baxılacaq”.

"Bu layihə ["Şəfəq” layihəsi-red.] şirkətin sıfır neytrallığa nail olmaq məqsədlərinə və bərpa olunan enerji sektorunun inkişafında Azərbaycanın maraqlarına cavab verir", - T.Bayatlı əlav edib.

O xatırladıb ki, BP şirkəti tərəfdaşları ilə birlikdə Azərbaycanda və regionda neft və qaz sahəsində layihələrə 84 milyard ABŞ dollardan çox sərmayə yatırıb.

Onun sözlərinə görə, hazırda BP Azərbaycanda "yaşıl enerji" sahəsində layihələrini həyata keçirməyi planlaşdırır.